തിരുവനന്തപുരം: ഗവര്ണര് ആരിഫ് മുഹമ്മദ് ഖാനെ തിരികെ വിളിക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയൻ രാഷ്ട്രപതിക്ക് കത്ത് നൽകി. ഗവർണർ ചുമതല നിറവേറ്റുന്നില്ലെന്ന് ചൂണ്ടിക്കാട്ടിയാണ് രാഷ്ട്രപതി ദ്രൗപദി മുർമുവിന് മുഖ്യമന്ത്രി കത്തയച്ചത്. നിരന്തരം പ്രോട്ടോക്കാള് ലംഘനം നടത്തുന്നുവെന്നും കത്തിൽ വിമർശിക്കുന്നു.
ഭരണഘടനാ ചുമതലകൾ ഗവർണർ നിർവഹിക്കുന്നില്ലെന്ന് കത്തിൽ ചൂണ്ടിക്കാട്ടുന്നു. ബില്ലുകൾ ഒപ്പിടാതെ ദീർഘകാലം പിടിച്ചുവയ്ക്കുന്നുവെന്നും കത്തിലുണ്ട്. സർക്കാരിൻ്റെ സുഗമമായ ഭരണ നിർവഹണത്തിന് രാഷട്രപതി ഇടപെടണമെന്നും മുഖ്യമന്ത്രി ആവശ്യപ്പെട്ടു.
ഗവര്ണറും സര്ക്കാരും തമ്മില് ദീര്ഘകാലമായി നിലനില്ക്കുന്ന ഭിന്നതകൾക്കിടെയാണ് ഗവര്ണറെ തിരിച്ചുവിളിക്കണമെന്ന് സംസ്ഥാനം ആവശ്യപ്പെടുന്നത്.
ബില്ലുകളില് ഗവര്ണര് ഒപ്പിടാന് വൈകുന്നതും സര്വകലാശാലകളിലെ നിയമനവും അടക്കമുള്ളവ സുപ്രീം കോടതിയില്വരെ എത്തിയിരുന്നു. അതിനിടെ ഗവര്ണര്ക്കെതിരെ പ്രതിഷേധവുമായി എസ്എഫ്ഐ രംഗത്തെത്തിയതോടെ പ്രശ്നങ്ങള് വീണ്ടും വഷളായി.
വാഹനം തടഞ്ഞ് പ്രതിഷേധിക്കുകയും കരിങ്കൊടി കാണിക്കുകയും ചെയ്ത എസ്എഫ്ഐ -ക്കാര്ക്കെതിരെ അതിരൂക്ഷമായ ഭാഷയിലാണ് ഗവര്ണര് പ്രതികരിച്ചത്. കാമ്പസുകളില് ഗവര്ണറെ കാലുകുത്താന് അനുവദിക്കില്ലെന്ന് എസ്എഫ്ഐയുടെ വെല്ലുവിളിക്ക് കാലിക്കറ്റ് സര്വകലാശാല ഗസ്റ്റ് ഹൗസില് താമസിക്കുമെന്ന് പ്രഖ്യാപിച്ചു കൊണ്ടാണ് ഗവര്ണര് മറുപടി നല്കിയത്. അദ്ദേഹത്തിനെതിരെ എസ്എഫ്ഐ പ്രവര്ത്തകര് ഉയര്ത്തിയ ബാനറുകൾ അദ്ദേഹം പൊലീസിനെ ക്കൊണ്ട് അഴിപ്പിച്ചിരുന്നു.
പിന്നാലെ പൊലീസ് സുരക്ഷ ആവശ്യമില്ലെന്നു പറഞ്ഞ് ഗവര്ണര് കോഴിക്കോട് മിഠായിത്തെരുവിലെത്തി ഹല്വ രുചിച്ചതടക്കം പ്രോട്ടോകോള് ലംഘനമാണെന്ന് മുഖ്യമന്ത്രി പിണറായി വിജയന് ആരോപിച്ചിരുന്നു. ഉത്തരവാദിത്തപ്പെട്ട പദവിയില് ഇരിക്കുന്ന ഒരാള് ഇങ്ങനെയൊന്നും ചെയ്യാന് പാടില്ലെന്ന് അദ്ദേഹം വിമര്ശിച്ചിരുന്നു. സര്ക്കാരിനെ ഏറ്റുമുട്ടുന്നതിന് ബോധപൂര്വം ശ്രമിക്കുകയാണെന്നും മുഖ്യമന്ത്രി ആരോപിച്ചിരുന്നു.
