പാറശ്ശാല ഷാരോണ് രാജ് കൊലക്കേസില് പോലീസിനെ കുരുക്കിലാക്കി ഒന്നാംപ്രതി ഗ്രീഷ്മയുടെ രഹസ്യമൊഴി. പോലീസ് നിര്ബന്ധിച്ച് കുറ്റസമ്മതം നടത്തിച്ചെന്നാണ് മജിസ്ട്രേറ്റിന് രഹസ്യ മൊഴി നല്കിയത്..നെയ്യാറ്റിന്കര രണ്ടാം ക്ലാസ് മജിസ്ട്രേറ്റ് വിനോദ് ബാബുവിന് മുമ്പാകെയാണ് രഹസ്യമൊഴി നല്കിയത്. അതേസമയം ഗ്രീഷ്മയുടെ റിമാന്ഡ് കാലാവധി വരുന്ന ഇരുപത്തിരണ്ട് വരെ നീട്ടി.
വ്യാഴാഴ്ച ഉച്ചയ്ക്ക് 12 മണിയോടെയാണ് അട്ടക്കുളങ്ങര വനിത ജയിലില് നിന്ന് അന്വേഷണസംഘം ഗ്രീഷ്മയുമായി നെയ്യാറ്റിന്കര മജിസ്ട്രേറ്റ് കോടതിയില് എത്തിയത്. അഭിഭാഷകനുമായി രണ്ട് മിനിറ്റ് തനിച്ച് സംസാരിക്കാന് ഗ്രീഷ്മക്ക് അവസരം നല്കിയ പോലീസ് 12.20ന് രഹസ്യമൊഴി രേഖപ്പെടുത്തുന്നതിനായി രണ്ടാം ക്ലാസ് മജിസ്ട്രേറ്റ് വിനോദ് ബാബുവിൻ്റെ മുറിയില് എത്തിച്ചു.
പെന് ക്യാമറയില് ദൃശ്യങ്ങള് പകര്ത്തണമോ എന്ന മജസ്ട്രേറ്റിൻ്റെ ചോദ്യത്തിന് ഗ്രീഷ്മ വേണമെന്ന് മറുപടി നല്കിയതോടെ മുഴുവന് ഉദ്യോഗസ്ഥരെയും പുറത്തുനിര്ത്തി വീഡിയോ ക്യാമറയില് ദൃശ്യങ്ങള് പകര്ത്തിയാണ് മജിസ്ട്രേറ്റിൻ്റെ മുറിയില് വച്ച് രഹസ്യമൊഴി രേഖപ്പെടുത്തിയത്.
അന്വേഷണസംഘം നിര്ബന്ധിച്ചു കുറ്റസമ്മതം നടത്തിച്ചതായി ആണ് കേസിലെ ഒന്നാം പ്രതിയായ ഗ്രീഷ്മയുടെ മൊഴി എന്നാണ് സൂചന. കുറ്റസമ്മതം നടത്തിയാല് അമ്മയെയും അമ്മാവനെയും പ്രതി പട്ടികയില് നിന്ന് ഒഴിവാക്കാമെന്ന് ഉറപ്പു നല്കിയിരുന്നതായും രഹസ്യമൊഴിയില് പരാമര്ശം ഉണ്ട് . പക്ഷേ മറിച്ചാണ് സംഭവിച്ചത്. അതുകൊണ്ടാണ് ഇപ്പോള് രഹസ്യ മൊഴി നല്കുന്നതെന്നും ഗ്രീഷ്മ മജിസ്ട്രേറ്റിനെ അറിയിച്ചു.
