ഉപ്പള / കാസർകോട്: ഗുണ്ടാസംഘങ്ങള് ഉപ്പളയില് പിടിമുറുക്കുന്നു. പത്തംഗ സംഘം യുവാവിനെ കല്ല് കൊണ്ട് തലക്കിടിച്ച് ക്രൂരമായി പരിക്കേല്പ്പിച്ചു. ഉപ്പള റെയില്വേ ഗേറ്റിന് സമീപം ഷാഫി നഗറിലെ ബഷീറി(36)നെയാണ് മര്ദ്ദിച്ചത്.
കുമ്പള സഹകരണ ആശുപത്രിയില് പ്രവേശിപ്പിച്ചു. വ്യാഴാഴ്ച വൈകിട്ട് അഞ്ചു മണിയോടെ ഷാഫി നഗറില് സുഹൃത്തിനെ കാത്ത് നില്ക്കുന്നതിനിടെ രണ്ട് പേര് ബൈക്കിലെത്തി മര്ദ്ദിക്കുകയും അതിനിടെ എട്ടോളം പേരെ വിളിച്ച് വരുത്തിയും അക്രമിക്കുകയും ചെയ്തു.
സംഘത്തിലെ ഒരാള് ബഷീറിൻ്റെ തലയില് കല്ല് കൊണ്ട് തലങ്ങും വിലങ്ങും ഇടിച്ച് പരിക്കേല്പ്പിക്കുക ആയായിരുന്നുവത്രെ. ബോധരഹിതനായി വീണ ബഷീറിനെ റോഡില് ഉപേക്ഷിച്ച് സംഘം രക്ഷപ്പെടുകയായിരുന്നു.
ഒരു കേസുമായി ബന്ധപ്പെട്ടാണ് അക്രമത്തിന് കാരണമെന്ന് സംശയിക്കുന്നതായി പൊലീസ് പറഞ്ഞു. 20 ദിവസം മുമ്പ് ഉപ്പളയില് കലാപരിപാടിയെ ചൊല്ലി ഒരു യുവാവിനെ വെട്ടി പരിക്കേല്പ്പിച്ചിരുന്നു.
ഗുണ്ടാ സംഘങ്ങള് വീണ്ടും പിടിമുറുക്കിയതോടെ പൊലീസിന് കൂടുതല് തലവേദന സൃഷ്ടിക്കുന്നു. വര്ഷങ്ങള്ക്ക് മുമ്പ് ഉപ്പള, ബായാര്, പൈവളിഗെ എന്നിവിടങ്ങളില് തട്ടികൊണ്ടു പോകല്, വധശ്രമം, ഭീഷണിപ്പെടുത്തി പണം തട്ടല് തുടങ്ങിയ കുറ്റകൃത്യങ്ങളിൽ ഏര്പ്പെടുന്ന സംഘങ്ങള് പൊലീസിൻ്റെ കര്ശന നടപടിയെ തുടര്ന്ന് ഉള്വലിഞ്ഞിരുന്നു.
മൂന്നില് കൂടുതല് കേസുകളില് പെട്ടവര്ക്കെതിരെ കാപ്പ ചുമത്താനും പൊലീസ് നടപടി ആരംഭിച്ചു. രാത്രി കാലങ്ങളില് പരിശോധന ശക്തമാക്കും.
