കാസർകോട് ജില്ലയിലെ എന്ഡോസള്ഫാന് ദുരിതബാധിതരുടെ പ്രശ്നങ്ങള് പരിഹരിക്കണമെന്ന് ആവശ്യപ്പെട്ട് സാമൂഹിക പ്രവര്ത്തക ദയാബായി നടത്തുന്ന നിരാഹാര സമരം ഒത്തുതീര്പ്പാക്കാന് സര്ക്കാര് തയാറായില്ലെങ്കില് സമരം യു.ഡി.എഫ് ഏറ്റെടുക്കുമെന്ന് വി.ഡി സതീശൻ.
ദയാബായിയുടെ സമരത്തിന് ഐക്യദാര്ഢ്യം പ്രഖ്യാപിച്ച് ഡി.സി.സി സംഘടിപ്പിച്ച മാര്ച്ചിനെ അഭിസംബോധന ചെയ്ത് സംസാരിക്കുകയായിരുന്നു പ്രതിപക്ഷ നേതാവ്. സംസ്ഥാനത്തിൻ്റെ എല്ലായിടത്തും യു.ഡി.എഫിൻ്റെ നേതൃത്വത്തില് സമരം ആരംഭിക്കും. സര്ക്കാരിന് പരിഹരിക്കാവുന്ന പ്രശ്നങ്ങള് മാത്രമാണ് ഉന്നയിച്ചിരിക്കുന്നത്. സമയബന്ധിതമായി പ്രശ്നങ്ങള് പരിഹരിക്കുമെന്ന് ആരോഗ്യമന്ത്രി ഉറപ്പ് നല്കിയാല് ദായാബായി സമരം അവസാനിപ്പിക്കും.
ആരോഗ്യമന്ത്രി നാട്ടില് എത്തിയാലുടന് ഈ വിഷയത്തില് ഇടപെടണമെന്ന് ആവശ്യപ്പെടും. എന്തെങ്കിലും പ്രഹസനം കാട്ടി സര്ക്കാരിന് സമരം അവസാനിപ്പാക്കാനാകില്ല. ഉന്നയിക്കുന്ന കാര്യങ്ങളില് കൃത്യമായ നടപടി ഉണ്ടായാല് മാത്രമെ ദയാബായി സമരം അവസാനിപ്പിക്കൂ. ജില്ലയില് ആശുപത്രി സംവിധാനങ്ങള് പരിമിതമാണ്. ലോക്ഡൗണ് കാലത്ത് അതിര്ത്തി അടച്ചതുകൊണ്ട് മതിയായ ചികിത്സ ലഭിക്കാതെ ഇരുപതോളം പേരാണ് മരിച്ചത്. ജില്ലയിലെ ആശുപത്രികളില് ആവശ്യമായ ചികിത്സാ സംവിധാനങ്ങള് ഏര്പ്പെടുത്തണമെന്നാണ് സമരത്തിലൂടെ ആവശ്യപ്പെടുന്നത്.
