ആലപ്പുഴയിൽ കടലില് ഇന്ന് രാവിലെയുണ്ടായ അതിശക്തമായ ചുഴലിക്കാറ്റില് വ്യാപക നാശനഷ്ടം. ഏതാണ്ട് ഏട്ടോളം പേരെ അപകടത്തെ തുടര്ന്ന് വണ്ടാനം മെഡിക്കല് കോളേജില് പ്രവേശിപ്പിച്ചു. ഇന്ന് രാവിലെ 10 മണിക്ക് ശേഷമായിരുന്നു ഉള്ക്കടലില് ചുഴലി പ്രത്യക്ഷപ്പെട്ടത്. മീന് പിടിക്കാന് പോയ വള്ളങ്ങളിലുണ്ടായിരുന്നവരാണ് ആദ്യം ചുഴലി കണ്ടത്.
ഈ സമയം കടലില് വള്ളമിറക്കാനെത്തിയവര് കോള് കണ്ട് വള്ളമിറക്കാതെ കരയില് മാറി നിന്നു. എന്നാല്, ഏതാനും നിമിഷത്തിനുള്ളില് കടല് ചുഴലിയുടെ പ്രഭാവത്തില് കരയിലേക്ക് അതിശക്തമായ കാറ്റ് വീശി. ഈ സമയം കടലിലിറക്കാനായി തയ്യാറെടുക്കുകയായിരുന്ന വള്ളങ്ങളെ കാറ്റ് എടുത്തുയര്ത്തി കരയിലടിച്ചതായി ദൃക്ഷ്സാക്ഷികള് പറഞ്ഞു.
