കാസർകോട്: കുട്ടിയെ തട്ടിക്കൊണ്ട് പോയി പീഡിപ്പിച്ച കേസിൽ ഒരാൾ കസ്റ്റഡിയിൽ. പ്രദേശത്ത് നിന്ന് ലഭിച്ച സി.സി.ടി.വി ദൃശ്യങ്ങൾ പ്രകാരമാണ് ഇയാളെ കസ്റ്റഡിയിൽ എടുത്തത്. എന്നാല് ഇയാളാണ് പ്രതിയെന്ന് സ്ഥിരീകരിച്ചിട്ടില്ല. വ്യാഴാഴ്ച പുലര്ച്ചെ മൂന്ന് മണിയോടെയാണ് സംഭവം നടന്നത്. വീട്ടില് ഉറങ്ങി കിടക്കുകയായിരുന്ന പത്ത് വയസുകാരിയെ കട്ടിലില് നിന്ന് എടുത്തുകൊണ്ട് പോവുകയായിരുന്നു.
കുട്ടിയുടെ മുത്തച്ഛൻ പശുവിനെ കറക്കാന് വീടിന്റെ മുന് വാതില് തുറന്ന് തൊഴുത്തില് പോയ സമയത്താണ് അക്രമി വീടിനകത്ത് കയറിയത്.
ഉറങ്ങി കിടന്ന പെണ്കുട്ടിയെ തട്ടിയെടുത്ത് അടുക്കള വശത്തുള്ള വാതിലിലൂടെ പുറത്തിറങ്ങിയ പ്രതി 500 മീറ്റര് അകലെയുള്ള സ്ഥലത്തെത്തിച്ച് പീഡിപ്പിക്കുകയും സ്വര്ണ്ണ കമ്മലുകള് കവര്ന്ന ശേഷം കുട്ടിയെ ഉപേക്ഷിച്ച് രക്ഷപ്പെടുകയും ആയിരുന്നു.
പുലര്ച്ചെ നടന്ന സംഭവം വീട്ടിലുണ്ടായിരുന്ന കുട്ടിയുടെ മാതാപിതാക്കള് അടക്കമുള്ളവര് അറിഞ്ഞില്ല. തൊഴുത്തില് നിന്ന് മുറിയില് തിരിച്ചെത്തിയ മുത്തച്ഛനാണ് കുട്ടിയെ കാണാതായത് അറിയുന്നത്. പെണ്കുട്ടിയെ തട്ടിക്കൊണ്ട് പോയി സ്വര്ണ്ണാഭരണം കവര്ന്നുവെന്നായിരുന്നു ആദ്യം കരുതിയിരുന്നത്. എന്നാല് മെഡിക്കല് റിപ്പോര്ട്ട് വന്നതോടെയാണ് കുട്ടി ലൈംഗിക അതിക്രമത്തിന് ഇരയായതായി മനസിലായത്. കുട്ടി കാഞ്ഞങ്ങാട് ജില്ലാ ആശുപത്രിയില് ചികിത്സ തേടി.
