കൊച്ചി: നേതാക്കളെ കസ്റ്റഡിയില് എടുത്തതില് പ്രതിഷേധിച്ച് ചൊവ്വാഴ്ച എസ്.ഡി.പി.ഐ സംസ്ഥാന വ്യാപകമായി ഹര്ത്താല് ആചരിക്കും. രാവിലെ ആറു മുതല് വൈകുന്നേരം ആറുവരെയാണ് ഹര്ത്താല്. പാല്, പത്രം, ആശുപത്രി എന്നിവ ഹര്ത്താലില് നിന്നും ഒഴിവാക്കിയിട്ടുണ്ടെന്ന് സംസ്ഥാന ജനറല് സെക്രട്ടറി പി അബ്ദുല് ഹമീദ് വാര്ത്താക്കുറിപ്പില് അറിയിച്ചു. എറണാകുളം പ്രസ്സ് ക്ലബില് വാര്ത്താസമ്മേളനം നടത്തി ഇറങ്ങവേ അകാരണമായി സംസ്ഥാന പ്രസിഡന്റ് അബ്ദുല് മജീദ് ഫൈസി, വൈസ് പ്രസിഡന്റ് എം.കെ മനോജ് കുമാര്, ജനറല് സെക്രട്ടറി റോയി അറയക്കല്, എറണാകുളം ജില്ലാ പ്രസിഡന്റ് ഷൗക്കത്തലി തുടങ്ങിയവരെ കസ്റ്റഡിയില് എടുത്തതില് പ്രതിഷേധിച്ചാണ് ഹര്ത്താലിന് ആഹ്വാനം ചെയ്തത്. 
അഭിമന്യു കൊല്ലപ്പെട്ട കേസില് വിശദീകരണം നല്കാനാണ് എസ്.ഡി.പി.ഐ നേതാക്കള് വാര്ത്താസമ്മേളനം നടത്തിയത്. കരുതല് തടങ്കല് എന്ന നിലയിലും ചോദ്യം ചെയ്യുന്നതിനും വേണ്ടിയാണ് ഇവരെ കസ്റ്റഡിയിലെടുത്തതെന്നാണ് വിവരം. ഹര്ത്താലിനെ തുടര്ന്ന് എംജി സര്വകലാശാല ചൊവ്വാഴ്ച നടത്താനിരുന്ന എല്ലാ പരീക്ഷകളും മാറ്റിവച്ചു. പുതുക്കിയ തീയതി പിന്നീട് അറിയിക്കുമെന്ന് സര്വകലാശാല അധികൃതര് അറിയിച്ചു.
വാര്ത്താസമ്മേളനം നടത്തി ഇറങ്ങവേ നേതാക്കളെ കസ്റ്റഡിയിലെടുത്തു; നാളെ സംസ്ഥാനത്ത് എസ്.ഡി.പി.ഐ ഹര്ത്താല്
