ആമസോണ് കാടുകളില് കാട്ടുതീ പടരുന്നത് അവഗണിക്കുന്നുവെന്ന് ആരോപണം. ഹോളിവുഡ് താരം ഡി കാപ്രിയോ ചോദ്യംചെയ്ത് രംഗത്തെത്തി. കത്തിയെരിയുന്ന ആമസോണ് കാടുകളുടെ ചിത്രം ഡി കാപ്രിയോ പങ്കുവെച്ചു. ഭൂമിയിലെ ഏറ്റവും വലിയമഴക്കാടുകള്, ഭൂമിയിലെ ജീവജാലങ്ങള്ക്കുവേണ്ട ജീവവായുവിന്റെ 20 ശതമാനം പുറത്തുവിടുന്ന മേഖല, ലോകത്തിന്റെ ശ്വാസകോശമെന്ന് വിശേഷിപ്പിക്കാവുന്നയിടം, കഴിത്ത 16 ദിവസമായി അത് കത്തിയമരുകയാണ്. അക്ഷരാര്ഥത്തില് ഒറ്റ മാധ്യമംപോലും അതേക്കുറിച്ച് മിണ്ടുന്നില്ലെന്നും ഡി കാപ്രിയോ പറയുന്നു. എന്തുകൊണ്ട്?.
വിഷയം ഡി കാപ്രിയോ ഏറ്റെടുത്തതോടെ പിന്തുണയുമായി ലോകമെമ്പാടുമുള്ള ചലച്ചിത്രതാരങ്ങള് രംഗത്തുവന്നു. ബോളിവുഡ് താരങ്ങളായ അക്ഷയ് കുമാര്, പൂജ ബത്ര, ബിപാഷ ബസു, മല്ലെയ്ക അറോറ, ശ്രദ്ധകപൂര് തുടങ്ങിയവര് പോസ്റ്റ് പങ്കുവച്ചു. ആഗോള പരിസ്ഥിതി വിഷയങ്ങളില് മുമ്പും ഡി കാപ്രിയോ ശക്തമായ നിലപാടുകള് ഉന്നയിച്ചിട്ടുണ്ട്. കാലാവസ്ഥാ വ്യതിയാനത്തെക്കുറിച്ചുള്ള റിപ്പോര്ട്ടുകളെ അവഗണിച്ചുതള്ളുന്ന അമേരിക്കന് പ്രസിഡന്റ് ഡോണള്ഡ് ട്രംപിന്റെ ശക്തനായ വിമര്ശകന് കൂടിയാണ് ഡി കാപ്രിയോ.
