ചെന്നൈ: ഓഗസ്ത് നാലിന് ചെന്നൈയിലെ ട്രാന്സ് കാര് ഡീലറില് നിന്നാണ് അമലാ പോള് ഒരു കോടി പന്ത്രണ്ട് ലക്ഷം രൂപ വിലമതിക്കുന്ന എസ് ക്ലാസ് ബെന്സ് കാര് വാങ്ങിയത്. ഓഗസ്ത് ഒമ്പതിന് പോണ്ടിച്ചേരിയില് രജിസ്റ്റര് ചെയ്തു. കേരളത്തില് രജിസ്റ്റര് ചെയ്തിരുന്നെങ്കില് സംസ്ഥാന ഖജനാവിലേക്ക് നികുതി ഇനത്തില് 20 ലക്ഷം രൂപ അമലാ പോള് നല്കേണ്ടിയിരുന്നു. എന്നാല് പോണ്ടിച്ചേരിയിലെ നികുതി ആനുകൂല്യം മുതലാക്കി ഒന്നേകാല് ലക്ഷം രൂപ മാത്രം നികുതി നല്കിയാണ് കാര് രജിസ്ട്രേഷന് നടത്തിയിരിക്കുന്നത്. കാര് രജിസ്റ്റര് ചെയ്തിരിക്കുന്നത് അമല പോളിനെ നേരിട്ട് അറിയുക പോലും ചെയ്യാത്ത എഞ്ചിനീയറിംഗ് വിദ്യാര്ഥിയുടെ വിലാസത്തിലും. ഏഴു വര്ഷം വരെ തടവുശിക്ഷ ലഭിക്കാവുന്ന കുറ്റമാണ് വ്യാജ രജിസ്ട്രേഷന്.
തിലാസപ്പെട്ടിലെ സെന്റ് തേരേസാസ് സ്ട്രീറ്റിലെ വിലാസത്തിലാണ് കാര് രജിസ്ട്രേഷന് ചെയ്തിരിക്കുന്നത്. എന്നാല് ഈ വിലാസത്തിലുള്ള വീട് ഒരു എഞ്ചിനീയറിങ് വിദ്യാര്ഥിയുടേതാണ്. ഇവര്ക്ക് അമലാ പോളിനെയോ കാര് രജിസ്ട്രേഷന് നടത്തിയ കാര്യമോ അറിയുക പോലുമില്ല എന്ന് മാതൃഭൂമി ന്യൂസ് നടത്തിയ അന്വേഷണത്തിലാണ് വ്യക്തമായത്.
