പ്രളയത്തെ തുടര്ന്ന് മുഖ്യമന്ത്രിയുടെ ദുരിതാശ്വാസ നിധിയിലെ തുക ഉപയോഗിച്ച് കുട്ടനാട്ടിലെ 12 പഞ്ചായത്തുകളില് പ്രളയപ്രതിരോധ ശേഷിയുള്ള കമ്മ്യൂണിറ്റി ഷെല്ട്ടറുകള് നിര്മിക്കുന്നതിന് മന്ത്രിസഭ തീരുമാനിച്ചു. കേരള സ്റ്റേറ്റ് ഫിനാന്ഷ്യല് എന്റര്പ്രൈസസ് മുഖേനയാണ് ഈ പദ്ധതി നടപ്പാക്കുക.
കഴിഞ്ഞവര്ഷം ഓഗസ്റ്റില് കേരളം നേരിട്ട പ്രളയദുരന്തത്തിന്റെ പശ്ചാത്തലത്തില് കെ.എസ്.എഫ്.ഇ 35.99 കോടി രൂപ മുഖ്യന്ത്രിയുടെ ദുരിതാശ്വാസ നിധിയിലേക്ക് സംഭാവന ചെയ്തിരുന്നു. ഈ തുക ഉപയോഗിച്ച് കുട്ടനാട്ടില് കമ്മ്യൂണിറ്റി ഷെല്ട്ടറുകള് നിര്മിക്കണമെന്ന താത്പര്യം കെ.എസ്.എഫ്.ഇ മാനേജ്മെന്റും ജീവനക്കാരും പ്രകടിപ്പിച്ചിരുന്നു. അതിന്പ്രകാരം പദ്ധതി നടപ്പാക്കുന്നതിന് 35.99 കോടി രൂപ കെ.എസ്.എഫ്.ഇക്ക് തിരികെ നല്കാന് മന്ത്രിസഭ അനുമതി നല്കി.
സംസ്ഥാന സഹകരണ വകുപ്പിന്റെ കെയര്ഹോം പദ്ധതി മാതൃകയിലാണ് ഈ കമ്മ്യൂണിറ്റി ഷെല്ട്ടറുകള് കെ.എസ്.എഫ്.ഇ നിര്മ്മിക്കുക. ഇതിനായി റോഡ് സൗകര്യമുള്ള ഒരേക്കര് വീതം സ്ഥലം ഉപയോഗിക്കുന്നതിന് പഞ്ചായത്തുകള്ക്ക് പ്രത്യേക അനുമതി നല്കാനും തീരുമാനിച്ചു. അതേപോലെ തന്നെ കേരളത്തിലെ പൊതുമേഖലാ സ്ഥാപനങ്ങളിലെ ജീവനക്കാര്ക്ക് 2018-19 സാമ്പത്തിക വര്ഷത്തെ ബോണസ് നല്കുന്നതിനുള്ള മാര്ഗനിര്ദേശങ്ങളും മന്ത്രിസഭ അംഗീകരിച്ചു.
കഴിഞ്ഞ വര്ഷം നല്കിയ തുകയില് കുറയാത്ത തുക ബോണസായി നല്കേണ്ടതാണ്. മിനിമം ബോണസ് 8.33 ശതമാനമായിരിക്കണമെന്നും നിശ്ചയിച്ചു.സര്ക്കാര് സര്വീസിലും പൊതുമേഖലാ സ്ഥാപനങ്ങളിലും വനിതകളെ ഡ്രൈവര്മാരായി നിയമിക്കാന് മന്ത്രിസഭ തീരുമാനിച്ചു. ഇതിനായി നിലവിലുള്ള നിയമനചട്ടങ്ങളില് ഭേദഗതി വരുത്തും. സമൂഹത്തിന്റെ എല്ലാ മേഖലകളിലും ലിംഗ സമത്വം ഉറപ്പാക്കാനുള്ള സര്ക്കാര് തീരുമാനത്തിന്റെ അടിസ്ഥാനത്തിലാണ് സ്ത്രീകളെ ഡ്രൈവര്മാരായി നിയമിക്കുന്നത്. 35-ാമത് ദേശീയ ഗെയിംസില് കേരളത്തിനു വേണ്ടി വെള്ളി, വെങ്കല മെഡലുകള് നേടിയ 83 കായികതാരങ്ങള്ക്ക് വിവിധ വകുപ്പുകളില് സൂപ്പര്ന്യൂമററി തസ്തികള് സൃഷ്ടിച്ച് പൊതുഭരണവകുപ്പ് വഴി നിയമനം നല്കാന് തീരുമാനിച്ചു.
കേരളത്തില് ദേശീയ ഗെയിംസില് സ്വര്ണം നേടുന്നവര്ക്കു മാത്രമാണ് ഇതുവരെ സര്ക്കാര് ജോലി നല്കിയിരുന്നത്. വയനാട് ജില്ലയില് സര്ക്കാര് മെഡിക്കല് കോളേജ് സ്ഥാപിക്കുന്നതിന് ചേലോട് എസ്റ്റേറ്റിലെ 50 ഏക്കര് ഭൂമി വ്യവസ്ഥകള്ക്കു വിധേയമായി ഏറ്റെടുക്കാന് തീരുമാനിച്ചു. വയനാട് ജില്ലയില് സര്ക്കാര് ഉടമസ്ഥതയില് ഇപ്പോള് മെഡിക്കല് കോളേജ് ഇല്ല. പവര്ലൂം തൊഴിലാളികളെ കൂടി കേരള കൈത്തറി തൊഴിലാളി ക്ഷേമനിധി ആക്ടിന്റെ പരിധിയില് കൊണ്ടുവരുന്നതിന് ഈ നിയമം ഭേദഗതി ചെയ്യാന് തീരുമാനിച്ചു.
ഇത് സംബന്ധിച്ച കരട് ബില്ലിന് മന്ത്രിസഭ അംഗീകാരം നല്കി. നിയമഭേദഗതി വരുമ്പോള് പവര്ലൂം തൊഴിലാളികള്ക്കു കൂടി ക്ഷേമനിധിബോര്ഡിന്റെ പെന്ഷന് ഉള്പ്പെടെയുള്ള ആനുകൂല്യങ്ങള് ലഭിക്കും.
