ന്യൂഡല്ഹി: എം.എല്.എയും നടനുമായ മുകേഷിനെതിരെ മീ ടു ക്യാംപെയിന്റെ ഭാഗമായി ആരോപണം. ഒരു ടെലിവിഷന് പരിപാടിയുടെ ചിത്രീകരണത്തിനിടയില് പത്തൊന്പത് വര്ഷം മുന്പ് നടന്ന സംഭവം ആണ് ടെസ് ജോസഫ് ആണ് വെളിപ്പെടുത്തുന്നത്. അന്ന് ചിത്രീകരണത്തിനിടയില് നടന് മുകേഷ് നിരന്തരം വിളിച്ച് തന്റെ അടുത്ത റൂമിലേക്ക് മാറാന് നിര്ബന്ധിച്ചെന്നാണ് അന്ന് ടെലിവിഷന് പരിപാടിയുടെ സാങ്കേതിക പ്രവര്ത്തകയായിരുന്ന ടെസ് ജോസഫ് പറയുന്നത്. ടെസ്സ് ജോസഫ് ട്വിറ്ററിലൂടെയാണ് വെളിപ്പെടുത്തല് നടത്തിയിരിക്കുന്നത്. പുരുഷന്മാരുടെ ക്രൂവില് താന് മാത്രമായിരുന്നു ഏക പെണ് സാങ്കേതിക പ്രവര്ത്തകയെന്നും അന്ന് താന് തങ്ങിയിരുന്ന ചെന്നൈയിലെ ലെ മെറിഡിയന് ഹോട്ടല് ഇവര്ക്കായി ഒത്താശ ചെയ്തിരുന്നുവെന്നും ടെസ്സ് ആരോപിക്കുന്നു. 
മുംബൈ കേന്ദ്രീകരിച്ച് പ്രവര്ത്തിക്കുന്ന കാസ്റ്റിം ഡയറക്ടറാണ് ടെസ്സ്. നിരന്തരം ഫോണ് വിളികള് വന്നതിനെ തുടര്ന്ന് അന്ന് തന്റെ മേധാവിയായ ഇപ്പോള് ടി.എം.സി എം.പിയായ ഡെറിക്ക് ഓബ്രെയിനോട് പറയുകയും അദ്ദേഹം അത് പരിഹരിക്കുകയും ചെയ്തിരുന്നു. അദ്ദേഹത്തിനോട് നന്ദിയുണ്ടെന്നും ടെസ് പറയുന്നു. അതേ സമയം ഡെറിക്ക് ഒബ്രയാന് സംഭവത്തില് പ്രതികരണമൊന്നും നടത്തിയില്ലെന്നാണ് റിപ്പോര്ട്ട്.
