പൗരത്വ നിയമത്തില് ആവശ്യമെങ്കില് മാറ്റം വരുത്താന് തയ്യാറാണെന്ന് കേന്ദ്ര ആഭ്യന്തര മന്ത്രി അമിത് ഷാ. പൗരത്വ നിയമം നടപ്പിലാക്കിയ ശേഷം അമിത് ഷാ ആദ്യമായി പങ്കെടുത്ത റാഞ്ചിയിലെ പൊതുയോഗത്തിനിടെയായിരുന്നു പരാമര്ശം. ‘കോണ്റാഡ് സാംഗ്മയും (മേഘാലയ മുഖ്യമന്ത്രി) മന്ത്രിമാരും എന്നെ വെള്ളിയാഴ്ച വന്ന് കണ്ടിരുന്നു. അവര് അഭിമുഖീകരിക്കുന്ന പ്രശ്നങ്ങള് എന്നോട് പറഞ്ഞു.
പ്രശ്നങ്ങളൊന്നുമില്ലെന്ന് അവരെ ബോധ്യപ്പെടുത്താന് ഞാന് ശ്രമിച്ചു. നിയമത്തില് ചില മാറ്റങ്ങള് വരുത്താന് അവര് നിര്ബന്ധിച്ചപ്പോള് ക്രിസ്തുമസിന് ശേഷം എന്നെ വന്ന് കാണാന് അവരോട് പറഞ്ഞിട്ടുണ്ട്. ‘ ക്രിയാത്മകമായ ചര്ച്ചയിലൂടെ മേഘാലയ അഭിമുഖീകരിക്കുന്ന പ്രശ്നം പരിഹരിക്കാമെന്ന് താന് അവര്ക്ക് ഉറപ്പ് നല്കിയിട്ടുണ്ടെന്നും അമിത് ഷാ പറഞ്ഞു.
അതേസമയം വടക്ക്-കിഴക്കന് സംസ്ഥാനങ്ങളില് നിയമത്തിനെതിരായ പ്രതിഷേധം കനക്കുകയാണ്. അസമിന്റെ ചരിത്രത്തില് ഇന്നേവരെ കാണാത്തത്ര ശക്തമായ പ്രതിഷേധത്തിനായിരുന്നു കഴിഞ്ഞ കുറച്ചുദിവസങ്ങള് സാക്ഷ്യം വഹിച്ചത്. മൂന്ന് റെയില്വേ സ്റ്റേഷനുകള്, പോസ്റ്റ് ഓഫീസ്, ബസ് ടെര്മിനല് എന്നിവ പ്രതിഷേധക്കാര് തീവെച്ചു നശിപ്പിച്ചു. അതിനിടെ പോലീസ് നടത്തിയ വെടിവെപ്പില് മൂന്നുപേര് കൊല്ലപ്പെടുകയും ചെയ്തു.
