ചെന്നൈ: തമിഴകത്തിന്റെ അമരത്ത് ഇരിപ്പുറപ്പിക്കും മുമ്പേ ശശികലയ്ക്കെതിരെ പ്രതിഷേധങ്ങളും പൊട്ടിപുറപ്പെട്ടു തുടങ്ങി. അണ്ണാ ഡി.എം.കെ ജനറല് സെക്രട്ടറിയായി ജയലളിതയുടെ തോഴി ശശികല നടരാജന് അധികാരമേറ്റെടുത്തതില് പ്രതിഷേധിച്ച് എ ഡി എം കെ പ്രവര്ത്തകന് ആത്മഹത്യയ്ക്കു ശ്രമിച്ചു. ജയലളിതയുടെ ശവകുടീരത്തിനു മുന്നില് വച്ചായിരുന്നു കെ.ശിവാജി ആനന്ദ് എന്ന പ്രവര്ത്തകന് ആത്മഹത്യയ്ക്ക് ശ്രമിച്ചത്.
എലിവിഷം കഴിച്ച് അവശ നിലയിലായിരുന്ന ഇയാളെ സമീപത്തുണ്ടായിരുന്ന നാട്ടുകാരാണ് ആശുപത്രിയിലെത്തിച്ചത്. ആനന്ദിന്റെ പോക്കറ്റില് നിന്നും ലഭിച്ച ആത്മഹത്യാകുറിപ്പില് നിന്നാണ് ശശികലയുടെ സ്ഥാനാരോഹണമാണ് ആത്മഹത്യാ പ്രേരണയെന്നുള്ള വിവരം ലഭിച്ചത്. ഇയാളുടെ നില അതീവ ഗുരുതരമാണെന്ന് ഡോക്ടര്മാര് അറിയിച്ചിരിക്കുകയാണ്.
