കൊച്ചി: ചട്ടം ലംഘിച്ച് സ്കൂളുകള്ക്കും കോളേജുകള്ക്കും സമീപം മൊബൈല് ടവര്. സംസ്ഥാന വിവരസാങ്കേതിക വിദ്യാ വകുപ്പ് പുറത്തിറക്കിയ ഉത്തരവിനു വിരുദ്ധമായി സ്കൂള്, കോളേജ്, ആശുപത്രി, അങ്കണവാടി, പോലീസ് സ്റ്റേഷന് എന്നിവയ്ക്ക് സമീപം മൊബൈല് ഫോണ് ടവറുകള് സ്ഥാപിക്കരുതെന്ന് സംസ്ഥാന മനുഷ്യാവകാശ കമ്മിഷന്. ഇതിനു വിരുദ്ധമായി നടക്കുന്ന ടവര് നിര്മാണ പ്രവര്ത്തനങ്ങള്ക്ക് അനുമതി നല്കരുതെന്നും കമ്മിഷന് ആക്ടിങ് അദ്ധ്യക്ഷന് പി. മോഹനദാസ് ഉത്തരവിട്ടു. സ്കൂള് ഹെഡ്മിസ്ട്രസ് വത്സല സി. ബേബി സമര്പ്പിച്ച പരാതിയിലാണ് ഉത്തരവ്. സ്കൂളിന് എതിര്വശത്തായി നിര്മിച്ച കെട്ടിടത്തിന്റെ മുകളിലാണ് ടവര് സ്ഥാപിക്കുന്നത്. മുന്നൂറോളം കുട്ടികള് പഠിക്കുന്ന, 120 വര്ഷം പഴക്കമുള്ള തൃപ്പൂണിത്തറ സേക്രഡ് ഹാര്ട്ട് യു.പി.എസിന് എട്ട് മീറ്റര് മാറി മൊബൈല് ഫോണ് ടവര് സ്ഥാപിക്കാനുള്ള നീക്കം അനുവദിക്കരുതെന്നും കമ്മിഷന് നിര്ദ്ദേശിച്ചു. കമ്മിഷന് നഗരസഭാ സെക്രട്ടറിയില്നിന്ന് റിപ്പോര്ട്ട് ആവശ്യപ്പെട്ടിരുന്നു. ഐഡിയയുടെ ടവര് സ്ഥാപിക്കാന് അപേക്ഷ ലഭിച്ചതിനെ തുടര്ന്ന് സ്ഥല പരിശോധന നടത്തി അനുമതി നല്കിയതായി നഗരസഭാ സെക്രട്ടറി കമ്മിഷനെ അറിയിച്ചു.
റസിഡന്റ്സ് അസോസിയേഷനും സ്കൂള് അധികൃതരും ഇതിനെതിരേ പരാതി നല്കിയിട്ടുണ്ട്. കെട്ടിട നിര്മാണ ചട്ടങ്ങള്ക്ക് അനുസൃതമായി പെര്മിറ്റ് നല്കിയതിനാല് പെര്മിറ്റ് റദ്ദ് ചെയ്യാന് കഴിയില്ലെന്നും നിര്മാണത്തിനു നല്കിയ അപേക്ഷയില് സ്കൂള് പ്രവര്ത്തിക്കുന്ന കാര്യം കമ്പനി പറഞ്ഞിട്ടില്ലെന്നും റിപ്പോര്ട്ടില് പറയുന്നു. 2015 ജനുവരി ഒന്നിന് വിവരസാങ്കേതിക വിദ്യാ വകുപ്പ് പുറത്തിറക്കിയ ഉത്തരവിനു വിരുദ്ധമായാണ് നഗരസഭ ടവറിന് അനുമതി നല്കിയതെന്ന് കമ്മിഷന് കണ്ടെത്തി. നിര്മാണ പ്രവര്ത്തനങ്ങള് അടിയന്തരമായി നിര്ത്തിവെപ്പിക്കണമെന്ന് കമ്മിഷന് ആക്ടിങ് അദ്ധ്യക്ഷന് പി. മോഹനദാസ് തൃപ്പൂണിത്തുറ നഗരസഭാ സെക്രട്ടറിക്ക് ഉത്തരവ് നല്കി.
ചട്ടം ലംഘിച്ച് സ്കൂളുകള്ക്കും കോളേജുകള്ക്കും സമീപം മൊബൈല് ടവര്; തടയിടാന് മനുഷ്യാവകാശ കമ്മിഷന് രംഗത്തിറങ്ങി
You Might Also Like
വനിതാ കമ്മീഷന് കേസെടുത്തു: ഒരു സ്വയം കല്പ്പിത തമ്പുരാട്ടിയുടെ ഭയപ്പെടുത്തലിന് വഴങ്ങില്ലെന്ന് പി.സി ജോര്ജ്
തദ്ദേശ തെരഞ്ഞെടുപ്പ്:ആരാധനാലയങ്ങളും വിദ്യാഭ്യാസ സ്ഥാപനങ്ങളും പ്രചരണ വേദിയാക്കരുത്
