മുഖ്യമന്ത്രിക്കെതിരെ രൂക്ഷ വിമര്ശനവുമായി കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്.അഡ്വക്കേറ്റ് ജനറലിനും കാബിനറ്റ് പദവി നല്കിയതിലൂടെ കേരള രാഷ്ട്രീയത്തിലെ മുടിയനായ പുത്രനായി മുഖ്യമന്ത്രി മാറിയെന്ന് അദ്ദേഹം കുറ്റപ്പെടുത്തി. അഡ്വക്കേറ്റ് ജനറലിന് കാബിനറ്റ് പദവി നല്ക്കേണ്ട പ്രത്യേക സാഹചര്യം എന്തെന്ന് വിശദീകരിക്കാന് മുഖ്യമന്ത്രിയും നിയമ മന്ത്രിയും തയ്യാറാകണം.
ഇഷ്ടക്കാര്ക്ക് കാബിനറ്റ് പദവി നല്കുന്നത് പിണറായി സര്ക്കാരിന്റെ പതിവ് പരിപാടിയായി മാറി. സംസ്ഥാനം കടുത്ത സാമ്പത്തിക പ്രതിസന്ധിയിലൂടെ കടന്ന് പോകുമ്പോഴാണ് ഇടതുസര്ക്കാരിന്റെ അനാവശ്യ ധൂര്ത്ത്. സംസ്ഥാനത്ത് കാബിനറ്റ് റാങ്കുകാരെ തട്ടിയിട്ട് നടക്കാന് കഴിയാത്തഅവസ്ഥയാണെന്നും അദ്ദേഹം കൂട്ടിച്ചേര്ത്തു.
ഇവര്ക്കൊല്ലാം ഔദ്യോഗിക വസതി, ജീവനക്കാര്, വാഹനം തുടങ്ങിയവയ്ക്കും സര്ക്കാര് ചെലവാക്കേണ്ടത് കോടികളാണ്.
പ്രതിവര്ഷം നികുതിദായകന്റെ എത്രകോടിയാണ് ഇത്തരം ചെലവുകളുക്കായി സര്ക്കാര് പാഴ്ക്കുന്നതെന്ന് പൊതുജനത്തിന് മുന്നില് വിശദീകരിക്കണമെന്നും മുല്ലപ്പള്ളി പറഞ്ഞു. സംസ്ഥാനത്തിന് അധിക സാമ്പത്തികബാധ്യത വരുത്തുന്നതാണ് മന്ത്രിസഭാ തീരുമാനം. പുര കത്തുമ്പോള് വാഴവെട്ടുന്ന സമീപനമാണ് മുഖ്യമന്ത്രിക്കും സംസ്ഥാന മന്ത്രിമാര്ക്കും. ജീവിക്കാന് കഷ്ടപ്പെടുന്ന ജനതയോടുള്ള പിണറായി സര്ക്കാരിന്റെ വെല്ലുവിളിയാണ് ഇഷ്ടക്കാര് നല്ക്കുന്ന ഇത്തരം പ്രത്യേക പദവികള്.
മാധ്യമ ഉപദേഷ്ടാവ്, സാമ്പത്തിക ഉപദേഷ്ടാവ് ഉള്പ്പടെ മുഖ്യമന്ത്രിയുടെ ഓഫീസില് ഉപദേശക സംഘത്തിന്റെ ബഹളമാണ്. ഇതിന്റെ പുറമെയാണ് ഒരു ലക്ഷത്തിലധികം പ്രതിമാസ ശമ്പളനിരക്കില് അടുത്തകാലത്ത് ലെയ്സണ് ഓഫീസറായി വേലപ്പന് നായരെ മുഖ്യമന്ത്രി നിയമിച്ചതെന്നും അദ്ദേഹം കൂട്ടിച്ചേര്ത്തു.
