മനുഷ്യശരീരത്തിലെ പേശികള്ക്ക് വൈദുതി കടത്തിവിടാനുള്ള കഴിവുണ്ട്. മാത്രമല്ല, ശരീരത്തിലെ ജീവനുള്ള മിക്കവാറും കോശങ്ങളിലും വൈദുതി ഉണ്ടുതാനും. ഹൃദയമിടിപ്പിന്, കാണുന്നതിന്,കേള്ക്കുന്നതിന്,പുസ്തകം വായിക്കുന്നതിന് എല്ലാം ഈ വൈദുതി കൂടിയേ തീരു. പക്ഷെ ഇത് വളരെ നേര്ത്ത അളവില് ആണെന്ന് മാത്രം.
ക്രമത്തിലധികം വൈദുതി ശരീരഭാഗങ്ങളില് കൂടി കടന്നുപോകാന് ഇടയായാല് അത് ശാരീരിക പ്രവർത്തനങ്ങളെ ദോഷകരമായി ബാധിക്കും. ഹൃദയപേശികളിലൂടെ ബാഹ്യവൈദ്യുതി കൂടിയ അളവില് ഒഴുകിയാല് പേശികള് തകര്ന്നുപോകാം. ഹൃദയസ്പന്ദനം നടക്കുന്നത് ഹൃദയത്തിലെ പേസ്മേക്കർ എന്ന ഒരു സംവിധാനം നല്കുന്ന സ്പന്ദനങ്ങളെ ആധാരമാക്കിയാണ്. കൃത്യമായ ഇടവേളകളില് ആണ് ഈ സ്പന്ദനങ്ങള് ഉണ്ടാവുക.
തെറ്റായ അളവില് മറ്റൊരു വൈദുതിപ്രവാഹം ഉണ്ടാകുമ്പോള് ഹൃദയപേശികള്ക്ക് അത് തെറ്റായ കല്പ്പന ആണെന്ന് മനസിലാക്കാന് മാര്ഗമൊന്നുമില്ല. അപ്പോള് ഹൃദയത്തിന്റെ താളം തെറ്റലാവും ഫലം. ശ്വാസതടസ്സം ഉണ്ടാകാം. ഇവ മരണത്തിലേക്ക് നയിക്കാം.
ചെരുപ്പിടാതെ വൈദുതവാഹികളില് സ്പര്ശിക്കാന് ഇടയായാല് ശരീരത്തിലൂടെ വൈദുതി കടന്നുപോകും. ഇത് ശരീരത്തില് ഉണ്ടാക്കുന്ന കോച്ചലും അതിന്റെ പ്രത്യാഘാതങ്ങളും ആണ് ഷോക്ക് എന്നറിയപ്പെടുന്നത്. ഇത് ശരീരത്തിന്റെ വൈദുതി കടത്തിവിടുന്ന സ്വഭാവം കൊണ്ട് ഉണ്ടാകുന്നതാണ്.
